Brenti Jo BaGate Tamang

Yang Terbaru - Wei sob, skarang tahun 2012, coh ngoni lia ka blakang di tahun-tahun sebelumnya. Waktu blum torang pe jaman, kurang skali kasiang tu tindakan-tindakan Kriminal yang berdasarkan MIRAS, kong baru skarang tre pas torang pe jaman-jaman ini tu kekerasan deng tindak kriminal nae drastis. Apa so depe sebab??. Itu noh!! Sadar Sob.. samua ini karna tu MIRAS. Mall deng pusat-pusat hiburan skarang so banya, ngoni stress atau saki hati, sudah jo mo lampiaskan di hal-hal yang nda terpuji, sama deng ngoni ada lari kong pi basandar pa iblis itu Sob,, Lebe bae, ngoni maso jo di mall-mall ato ngoni pi bakaroke, jang sama deng ngoni da hidop di jaman batu.OK? Ok dong!!

Skarang torang mo bahas dulu bagimana so tu MIRAS deng apa depe dampak for torang?

•  Pertama, torang lia dulu depe Sejarah MIRAS Di Minahasa.  

Sejarah MIRAS di tanah minahasa, belum di ketahui pasti. Tapi minuman keras asli yang berasal dari tanah Minahasa yaitu CAP TIKUS. Permulaan CAP TIKUS berasal dari pohon Aren atau yang biasa torang kenal dengan pohon SEHO. Dari pohon seho dia kaluar cairan yang di tampung yang biasa torang bilang SAGUER baru dari saguer, di olah dan di suling hingga lahirtu CAP TIKUS.

CAP TIKUS di kenal dari jaman torang pe tete deng nene moyang. For torang pe pendahulu-pendahulu CAP TIKUS itu dorang perlu skali. Mar!! tunggu dulu Sob.. dorang bagitu karna memang keadaan, bukang karna dorang stress mar alam yang beking dorang musti perlu tu CAP TIKUS, selain for pengobatan, dorang minum itu kana mo se ilang dingin karna dorang pe mata pencarian cuma di kobong. Bayangkan jo bagimana tu kobong pe dingin!! So karna itu noh dorang butuh tu barang itu.

• Apa So Tu MIRAS? 
  Apa so tu MIRAS sampe torang musti mo jaoh-jaoh daritu barang itu?

Ini bagi yang belum tau, MIRAS itu singkatan dari Minumman Keras. So… Kalo ngana rasa ngana pe diri kras, baru ngana minum itu. (yang kita tau hanya batu deng besi tu kras).

Dalam MIRAS, banya skali kandungan-kandungan yang kalo maso pa orang pe badan hanya mo jadi Racun. INGA INI TAMANG!!!! “Dorang nyanda mo bilang jago pa ngana hanya karna MIRAS, deng pikir bae-bae.. so banya orang yang da mati sia-sia hanya karna itu.”

• MIRAS Yang Banyak Di Manado

MIRAS di Manado ada banya skali depe varian di pasaran, Cuma kita hanya mo kase lia (hanya sekedar contoh supaya yang belum tau mo jadi tau) bebrapa minuman keras yang paling banya torang ja baku dapa akang.

• CAP TIKUS

•  
• KASEGARAN 

• SEGARAN SARI

• PINARACI

• ANGGUR

• TOPI MIRING

• VODKA

 Dan masi banyak lagi. susah mo di paparkan di sini.. OK..

• Dampak MIRAS

Dampak MIRAS for torang banyak skali tamang. So pernah dengar to tu dorang ja bilang-bilang ”MIRAS itu minuman setang, kalo torang so minumitu, kong setang dang minum apa?”

Butul tu kata-kata itu, kalo tu setang-setang samua so nintau mo minum apa, so kurang tu pamabo yang dorang mo minum. Buktinya, banya orang yang cilaka mati sia-sia hanya karna dorang minum kong mabo abis itu stel jago di jalang, karna dorang pe saraf so ta ganggu jadi dorang pikir tu aspal lombo. 

Ada leh yang so mabo mo stel jago, babatari di jalang kong sampe mo babakalae, Jadi papancuri karna so nda ada doi mo BAGATE, ba perkosa, sampe-sampe ni generasi muda banya yang putus sekolah karna MIRAS.

 Pokoknya banya skalini MIRAS pe dampak. Jalan satu-satunya supaya torang nda mo kena depe dampak, so musti hindari tu yang namanya MIRAS. Bagi yang so terlanjur, kase tinggal jo itu tamang… nda ena kalo mabo, sapa bilang muntah sadap?.. ngoni mabo depe laste sel yang menanti, bae jo kong masi sel, kalo so Kubur,, ngana mo manyasal bagimana leh? Oi Toh Sob… Jadi,, jaoh-jaoh jo noh deng Tu MIRAS.

Nah Sob.. skarang, Polda Sulut bekerja sama deng Telkomsel beserta Kawanua Blogger so menyebarkan di media cetak deng media elektronik “BRENTI JO BAGATE” jadi, jangan sia-siakan dorang pe upaya. Mari jo torang bangun torang pe tanah ini supaya lebe maju… Baku-baku pangge deng baku-baku se inga tu tamang-tamang deng seluruh masyarakat Supaya BRENTI JO BAGATE.

Inga..!! ini 2012 bukang jaman batu, ini jaman kompetisi bukang jaman mabo-mabo. Sadar Sob.. Sadar..

"BRENTI JO BAGATE"